في تدوينة له تساءل الاميرال كمال العكروت ان كان فحوى الجلستين الاخيرتين في البرلمان من اولويات المواطن التونسي؟
و اشار انه كان من الاجدى البحث عن حلول لمشاكل الشباب و سبل تسهيل طموحاته و اعتبر ان ما وقع بمجلس النواب هو اضرار بمصالح الدولة و خطاب ياس و نادى بعدم عرض الجلسات العامة على المباشر و بالكف عن الخصومات التي هي جزء من الحملات الانتخابية المبكرة و في مايلي نص التدوينة :
“بالله ماذا جَنَات تونس من الجلستين (2) الاخيرتين لمجلس النواب ؟؟؟ هل ما تم طرحه و ما تم النقاش فيه هو من اولويات البلاد و المواطن ؟؟؟
– في جلسة المساءلة الاولى عملنا أضرار وعداوات كان بإمكاننا تفاديها، مع دول تربطنا بها علاقات تعاون وكان بالامكان تطويرها في الظروف الصعبة اللّي نمرّوا بها !!!
– في جلسة المساءلة الثانية رغم اللّي قد يكون من حقنا باش نطالبو باعتذار ، هل هذا المطلب في الظرف الحالي هو أولوية؟؟؟
عندنا مشاريع قوانين عاجلة موجودة في الرفوف تستنى، عندنا مشاكل داخلية ربي يعلم بحالها خليناها على جيهة و ماشين تصنعوا في مشاكل الى قاعدة وباش ترجع علينا بالوبال…
لا رحمتو شعب مسكين غاطس في الفقر والخصاصة، وموش قاعد يرى في أمل، و معيشينو على الوعود و الشعبوية!
و لا رحمتو شباب قاعدين تعلمو فيه في العنف و الجهل و التخلّف و قلّة الحياء!
تتحدثوا على هيبة الدولة آش خليتوا فيها و آش خليتوا لارواحكم من هيبة…؟؟؟
شبابنا يحلم بتونس أجمل و بمستقبل أفضل ، فقد فيكم الامل، شباب 5G تحبوا ترجعوه الى العصور الحجرية، ألم يكن اولى باش اتفكروا مع الحكومة كيفاش اتسهلولها عيشتها باش تلقى حلول في تعليم و تكوين شبابنا واعدادو لمستقبل يتماشى مع طموحاته…حتى ابناءنا التوانسة المتواجدين بالخارج ما سِلموش منكم، خليتوهم أيسوا من دولتهم بتصرفاتكم و عراككم…
كلمتي الأخيرة إلّي تعملوا فيه قاعد يضر بمصلحة تونس وقاعد يبعث في اليأس في المواطن و قاعد يشلّك فيكم و في الدولة.
ننتظر منكم رؤية و تقوموا بعملكم التشريعي و الرقابي لما فيه منفعة للبلاد و العباد، المواطن ما عينوش باش يتفرّج فيكم كيفاش طيّحوا في قدر بعضكم و تبثّوا في العنف و الفوضى و تقسيم الشعب … و تزيفوا في الحقايق، حتى التاريخ ما سلمشي منكم…نصيحتي ما عادش تعدّيوا في التلفزة جلساتكم توّ تتلهاوا اكثر بخدمتكم وتنقصوا من العرك اللّي داخل في حملاتكم الانتخابية المبكّرة الخالصة على كاهل المجموعة الوطنية.
ملاحظة: كيف تعملوا جلسة باش تنشروا فيها غسيلكم اعملوها مغلقة.
ه/أ
